| భగవద్గీత 4-8
“ పరిత్రాణాయ సాధూనాం వినాశాయ చ దుష్కృతామ్ | ధర్మసంస్థాపనార్థాయ సంభవామి యుగే యుగే || ” |
పదచ్ఛేదం
పరిత్రాణాయ – సాధూనాం – వినాశాయ – చ – దుష్కృతాం – ధర్మసంస్థాపనార్థాయ – సంభవామి – యుగే – యుగే
ప్రతిపదార్థం
సాధూనాం = సత్పురుషుల యొక్క ; పరిత్రాణాయ = రక్షణ కోసం ; దుష్కృతాం = దుష్టుల యొక్క ; వినాశాయ = నాశనం కోసం; చ = మరియు ; ధర్మసంస్థాపనార్థాయ = ధర్మాన్ని స్థాపించటానికి ; యుగే యుగే = ప్రతి యుగంలోనూ ; సంభవామి = (నేను) అవతరిస్తాను
తాత్పర్యం
“ సజ్జనుల సంరక్షణార్థమూ, దుష్టజన శిక్షణకూ, ధర్మసంస్థాపన కోసం … ప్రతి యుగంలోనూ నేను అవతరిస్తూనే వుంటాను. ”
వివరణ
జయము – ‘ వి ’జయము, ఖ్యాతి – ‘ వి ’ఖ్యాతి, నాశము — ‘ వి ’నాశము …
ఇలా ‘ వి ’ అనేది విశేషమైన పదానికి సూచిక.
అలాగే “ పరిత్రాణాయ ”లో “ పరి ” అనేది, మరి “ సంస్థాపనార్థాయ ”,
“ సంభవామి ” అన్న పదప్రయోగాలలో “ సం ” అన్నవి చక్కటి ఉపసర్గలు …
విశేషార్ధకంగా ఉపయోగింపబడే ఉపసర్గలు.
సాధువులు ఎప్పుడూ రక్షింపబడుతూ ఉంటారు ;
“ సం ” రక్షింప బడుతూనే ఉంటారు ;
ఏకాలంలోనైనా కూడా సత్యం మారదు.
ఎప్పుడూ మంచి అన్నది సంరక్షింప బడుతూనే ఉంటుంది ;
చెడు అన్నది హతం అవుతూనే ఉంటుంది.
దుష్టవర్తనులకు ఎప్పుడూ ఆ చెడు ఫలితం వస్తూనే ఉంటుంది.
ఇది సత్యం ; ఇది కర్మ సిద్ధాంతం ; ఇది పురోగమన సిద్ధాంతం.
చెడు చెయ్యడాన్ని పైలోకవాసులు ఎవ్వరూ ప్రత్యేకంగా అడ్డగించరు …
చెడు చేస్తే చెడ్డ ఫలితమే వస్తుంది.
మంచి చేయడాన్ని పైలోకవాసులు ఎవ్వరూ విశేషంగా ప్రోత్సహించరు …
మంచి చేస్తే మంచి ఫలితమే వస్తుంది.
మంచి కర్మ వలన ఉద్ధరణ, చెడ్డ కర్మ వలన వినాశము జరుగుతాయి.
“ నేను తండ్రులను, తాతలను, గురువులను చంపేస్తున్నాను ”
అని అర్జునుడు అన్నప్పుడు …
శ్రీకృష్ణులవారన్నారు “ నీవు ఎవ్వరినీ చంపజాలవు ;
శరీరం చనిపోతుంది కానీ ఆత్మచావదు ” అని.
అదే సత్యం. అంతకంటే వేరొకటి లేదు.
“ సంభవామి యుగే యుగే ” …
ప్రతి ఆత్మ కూడానూ ఎప్పటికప్పుడు, మళ్ళీ మళ్ళీ …
పుడుతూనే ఉంటుంది, చస్తూనే ఉంటుంది.
ఆత్మకు పుట్టుక, చావు అన్నది ఒక ప్రయోగాత్మకమైన,
ఒక ప్రయోజనం వున్న, ఒక గొప్ప ఆట.
మనం శరీరాలం కాదు ‘ ఆత్మలం ’ అని తెలుసుకోవడమే సత్యం.
అర్జునుడు శరీర తత్త్వానికి ప్రతీక … ‘ నర ’ తత్త్వానికి ప్రతీక.
శ్రీకృష్ణుడు, వేదవ్యాసుడు మొదలైనవారు ఆత్మతత్త్వానికి ప్రతీకలు …
నారాయణ తత్త్వానికి ప్రతీకలు.
నరుడు “ నారాయణుడు ” కావాలి.
“ నరుడు ‘ నారాయణుడు ’గా ఎలా అవుతాడు? ” అంటే …
ధ్యానం చేసి … ధ్యాన యోగం చేసి … ధ్యానాభ్యాసం చేసి.
Pyramid Spiritual Societies Movement అన్నది ఈ ప్రపంచంలో
క్రూరమానవులుగా వున్నవారందరినీ సాధువులుగా తయారు చేసేందుకు,
దుష్కృతాలన్నీ అంతం చేసేందుకూ ఉద్భవించిన ఒకానొక చక్కటి మహోద్యమం.
పిరమిడ్ మాస్టర్లు ఊరూరా … వాడ వాడలా తిరిగి …
అందరికీ ధ్యానం నేర్పిస్తూ …
ప్రతి నరుడూ ఒక “ నారాయణుడు ” కావాలని ప్రబోధిస్తున్నారు.